Velaí ven, compañeira Sweena
Un de tantos xoves. Ábrese a porta do Atreu. Marta asoma o seu sorriso de luminosidade radical. Velaí ven, compañeira Sweena, cos seus cadros cargados de futuro.
As outras ‘Nomepises’ sentimos, canda ela, unha lumeirada de forza vermella na solar potencia da súa enerxía creativa. Trae, como proposta de acción, os trazos sostidos na memoria desatada de sermos mulleres insubmisas ás misas e a tantas e tantas premisas…
Ven dicirnos, linda lercha, que as mulleres conformamos unha pluralidade infinita, que non hai adxectivo que nos conteña, palabra que nos defina nin cláusula que nos resuma. Acha preciso, pois, parir léxico de novas posibilidades semánticas na mestura precisa dos versos cromáticos que descifren códigos abertos.
Propón transmitir correntes continuas de libre información que desencadeen ondas fosfóricas de lirismo interplanetario. Seica anda co ánimo propicio para iniciar todas as revolucións necesarias. Devir bicha. Así está o freghao.
Manifesta, compañeira Sweena, a prioridade colectiva de formármonos no manexo das ferramentas tecnolóxicas a prol de emitir mensaxes de lúdica liberación algareira.
Capitana da súa propia nave Naveiro, colle os mandos do teclado, disposta a enviar fervenza de streamings que proclamen o empoderamento da bicharada unida.
Fica constituído, na asemblea desta noite de lúa chea, o comité inaugural das skornagirls. Comandante Marta, raíña republicana (nome en clave Fuxidía, por ser mente en constante acción) móstranos as cartografías das derivas primeiras.
Así pois, renacidas á par dela, as skornagirls, vacalouras bravas, lindas a rabiar, okuparemos os muíños eólicos dos montes máis altos e alí sementaremos un poderoso hacklab. Seremos, xunto a ti, fermosas quixotas decididas a emerxer mil e unha respostas rebeldes fronte ós xigantes corporativos.
Facemos un chamamento as compañeiras avelaíñas, bolboretas, libeliñas, abellas (preferibelmente obreiras; zánganos abstenerse), xoaniñas…insectas todas, chegada é a nosa hora. A bicharada unida xamais será vencida!
